Uzbekcha.Net - Самые Новые хиты и Стихи к песням

Мухлислар, стадионга шошилинг! Кириш бепул!

OtasH — Sat, 11 Nov 2017 10:20:52 GMT

Аввалроқ, футбол бўйича Ўзбекистон кубогининг финал ўйини 4 декабрь, душанба куни Тошкентдаги “Бунёдкор” стадионида бўлиб ўтиши ҳақида хабар бериб ўтгандик. Маълумки, финалда Тошкентнинг икки етакчи: “Бунёдкор” ва “Локомотив” жамоалари майдонга тушишади. Учрашув маҳаллий вақт билан 15:00 да бошланади. Маълумотларга кўра, мазкур финал ўйинига кириш мутлақо бепул бўлади. Шунингдек, Ўзбекистон футбол федерацияси профессионал футбол лигаси билан ҳамкорликда кубок финалини байрамона тарзда ўтказиш мақсадида ўйиндан олдин мусиқий шоу-дастур ўтказишни режалаштирган. Бундан ташқари, финал ўйинини Бирлашган Араб Амирликларидан ташриф буюрган ҳакамлар бригадаси бошқариб боради. Мазкур ўйинда Муҳаммад Абдулла Ҳасан бош ҳакам вазифасини бажаради. Унга қанотларда Муҳаммад Ҳасан Абдулла ал-Маҳри ҳамда Муҳаммад Аҳмад Юсуф Абдулла ал-Ҳаммади ёрдам беради. Шу ўринда қайд этиш керакки, амирлик ҳакамларнинг Кубок финалини бошқариши Ўзбекистон футбол федерацияси ва БАА футбол уюшмаси ўртасидаги ҳамкорлик меморандуми доирасида амалга оширилмоқда. Маълумот учун, финал беллашуви мезбонини аниқлаш учун ташланган қуръада “Бунёдкор” номинал мезбон мақомига эга бўлди. Ҳал қилувчи баҳсда “Бунёдкор” футболчилари қизғиш-оқ рангли футболкаларда майдонга тушади. Ўзбекистон Кубогининг амалдаги соҳиби — “Локомотив” аъзолари эса оқ-яшил формада ўйнашади.

Рўзиқул Бердиев Игорь Сергеевнинг чақирилмаганига изоҳ берди

OtasH — Sat, 11 Nov 2017 10:18:52 GMT

Kecha, 10 ноябрь куни Тошкентдаги “Miran” меҳмонхонасида Ўзбекистон миллий терма жамоаси бош мураббийи вазифасини вақтинча бажарувчи Рўзиқул Бердиев иштирокида матбуот анжумани бўлиб ўтди. Матбуот анжуманида, шунингдек, терма жамоага жалб қилинган “Бухоро” ҳужумчиси Иван Нагаев ҳам иштирок этди. “...Режамиз бўйича бугун ва эртага Тошкентда машғулот ўтказамиз, 12–13 ноябрь кунлари эса бевосита БААда машғулотларни давом эттирамиз. Ҳозирда таркибга жалб қилинган барча футболчилар йиғинга соғ-саломат тарзда етиб келишди. Биз БААга қарши ўртоқлик ўйинида легионерлар хизматидан фойдаланмай, асосий эътиборни ёш футболчиларн синовдан ўтказишга қаратдик. ”, дея таъкидлади Рўзиқул Бердиев. Бердиев фикрини давом эттирар экан терма жамоага бугунги кунда ўз позицияларида энг кучли бўлиб турган футболчилар танлаб олинганини билдирди. Нима сабабдан Игорь Сергеевнинг таркибга жалб қилинмагани ҳақидаги саволга мураббий қуйидагича жавоб берди: “Мен Игорь Сергеевнинг ҳужумчи сифатидаги маҳоратига шубҳа қилмайман. У жуда кучли футболчи. Сергеев сўнгги вақтлар ичида кучли босимда қолганди. Балки, бироз танаффус унинг ўзига ҳам яхши таъсир қилар. Игорь Сергеев келажакда терма жамоага кўп фойда келтиришига ишонаман”. Тадбир давомида узоқ таннафусдан сўнг таркибга жалб қилинган Иван Нагаев ҳам ўз фикрлари билан ўртоқлашди. “Мен узоқ таннафусдан сўнг илк бор терма жамоадан таклиф олдим. Терма жамоа бу энг муҳим, бизнинг шарафимиз бўлган жамоадир. Ҳар бир футболчи бу ерда ўйнашни орзу қилади. Мен куч ва маҳоратимни ишга солиб, бу ердаги ўз ўрнимни сақлаб қолишга интиламан”, деб айтган Нагаев. Эслатиб ўтамиз, Рўзиқул Бердиев БААга қарши ўртоқлик ўйинига 23 нафар футболчини таклиф этган. Алоҳида таъкидлаб ўтиш керакки, мазкур ўйинда Бердиев легионерлар хизматидан фойдаланмайди. Ўзбекистон ҳамда БАА миллий терма жамоалари ўртасидаги ўйин 14 ноябрь куни Ал-Айн шаҳридаги “Халифа Бин Зайд” стадионида бўлиб ўтади. Учрашув Тошкент вақти билан соат 18:00да бошланади.

Зидан Роналду ва Мессидан кейин пайдо бўлган футболчи кимлигини айтди

OtasH — Sat, 11 Nov 2017 09:37:24 GMT

Мадриднинг “Реал” клуби бош мураббийи Зинедин Зидан ўз шогирди Криштиану Роналду ва “Барселона” ҳужумчиси Лионель Мессилардан ташқари яна бир бўлажак юқори истеъдод соҳиби борлигини айтиб ўтди. Зидан “ПСЖ” клубининг бразилиялик ҳужумчиси Неймар истеъдодини Роналду ва Месси билан тенглаштирди. “...Роналду ва Месси шубҳасиз дунёнинг энг яхши футболчилари ҳисобланишади. Уларнинг ўзига яраша футбол ўйнаш услублари бор. Икки футболчининг майдонда ва ҳаётда қилаётган ишларини бошқалар такрорлашига ишониш қийин. Тўғри, “Барселона” Мессига, “Реал” эса Роналду хизматларига доимо муҳтож. Месси, Роналду мавзусини муҳокама қиладиган бўлсак, ишонинг, муҳокамани йиллар давомида охирига етказиб бўлмайди. Тан олиш керак ҳар иккиси ҳам футболда ўз ўринларини топиб бўлишди. Лекин дунёда яна бир футболчи борлигини унутмаслигимиз лозим. Гап Роналду ва Мессидан кейин пайдо бўлган Неймар ҳақида кетмоқда. Бразилиялик футболчининг майдонда қилаётган ишлари тақсинга лойиқ. Унинг ҳаракатларидан шунчаки завқ олиш мумкин. Неймар “ПСЖ”га ўтиб тўғри қарор қабул қилди. Ҳар бир кишида ўз истак ва мақсадлари бўлади. Неймар ҳам айнан шу йўналишни танлади ва мақсади сари олға ҳаракат қилишда давом этмоқда”, дейди Зидан. Эслатиб ўтамиз, аввалроқ Неймар “Барселона” клубидаги жамоадошларига қайтиш истаги борлигини айтиб ўтгани ҳақида хабар бергандик.

Қимматбаҳо футболчи — Неймар “Барселона”га қайтиши мумкинми?

OtasH — Sat, 11 Nov 2017 09:33:38 GMT

Каталониянинг “Барселона” клуби футболчилари ёзги трансферлар мавсумида “ПСЖ”га ўтиб кетган собиқ жамоадоши Неймарнинг янги дўстларига кўникиб кета олмаётганидан хавотирга тушишмоқда. Бу ҳақда “Чемпионат” нашри хабар берди. “Барселона” футболчиларининг хавотирлари сабаби шуки, Неймар яқинда Каталонияга ташриф буюрди ва у ерда Месси ҳамда Суареслар билан суҳбат қурди. Ўз вақтида дунёнинг энг кучли учлиги сифатида номланган “МСН” триосидан ажралиб чиққан Неймар Суарес ва Мессига қараб “Мабодо “Барселона”га қайтсам яна мени қабул қиласизларми?” қабилида савол берган. Айтилишича, Неймар томонидан берилган савол, албатта, ҳазил бўлиши мумкин, лекин бразилиялик футболчи Парижга кўчиб ўтгандан сўнг бир нечта муаммоларга йўлиқди. Жумладан, ҳозирда дунёнинг энг қиммат футболчиси янги жамоаси сафида аввалига Эдинсон Кавани билан пенальти талашиб, катта муаммо келтириб чиқарди. Сўнгра, кутилмаганда қизил карточка билан сийланди, буниси ҳам етмаганидек “Марсель” мухлислари Неймар бурчак тўпи кўтараётган вақтда унга ўриндиқлардан турли хил буюмлар отишди. Майдондаги буюмлар орасида ҳатто булочка ҳам бор эди. Мана шу вазиятдан сўнг Неймар “Ўйин вақтида бемалол қорнимни тўйдириб олсам бўларди”, дея ҳазиломуз интервью бериб ўтди. Неймарнинг “Барселона” жамоасига қайтиши энди хақиқатга у қадар яқин эмас. Чунки бразилиялик футболчи ёзда ўзи истаб, Парижга йўл олди. Франция пойтахтидан қимматбаҳо уй сотиб олди. Бундан ташқари, унинг кунлик топаётган даромадини ҳисоблаб борадиган сайт яратилди. Лекин Неймар “ПСЖ” таркибида у қадар бахтли эмаслиги кўриниб турибди. Ахир “Барселона” клуби ҳар қайси жиҳатдан “ПСЖ”дан устунроқ эди-да! Эслатиб ўтамиз, Неймар ёзги трансферлар мавсумида 222 миллион евро эвазига “Барселона”дан “ПСЖ” таркибига кўчиб ўтган ва дунёнинг энг қиммат футболчисига айланганди.

Яна бир ўзбекистонлик террорчиликда айбланиб қўлга олинди

OtasH — Fri, 10 Nov 2017 07:46:33 GMT

Ўзбекистон мусулмонлари идораси раисининг ўринбосари Шайх Абдулазиз Мансур: “Ўзбеклар жуда ишонувчан халқ. Агар улар бир иш қилсалар, бутун қалбларини шунга бағишлайдилар. Менимча, айнан шу сабаб чет элга чиққан айрим ёшларимиз радикал гуруҳларга қўшилиб қолмоқдалар. Шу сабабли чет элда истиқомат қилаётган ўзбекларимиз бу каби гуруҳларнинг тўрига илинишдан эҳтиёт бўлсинлар”, деган эдилар. Ўз Ватанини тарк этиб, ёт, бузғунчи ғоялар тўрига илинган яна бир ўзбек йигити ўз халқининг юзини ерга қаратди, ота-онаси, туғилиб ўсган юртининг ишончини пучга чиқарди. Россиянинг Санкт-Петербург шаҳрида ҳуқуқни ҳимоя қилувчи орган вакиллари томонидан қидирув операцияси ташкиллаштирилган эди. Ҳаракатлар натижасида халқаро қидирувдаги 28 ёшли Ўзбекистон фуқароси қўлга олинди, дея хабар бермоқда “Nation News” ахборот агентлиги. Гумондор ярим тунда Васильевск ороли ҳудудида қўлга олинди. Ўзбекистонлик “меҳмон” террорчиликда, экстремистик гуруҳларга алоқадорликда, конституцион тузимни бузишга ҳаракатда, жамият тинчлигини бузиши мумкин бўлган материалларни тарқатганлиги учун айбланмоқда. “Қашқадарё вилояти ИИБ қидирув ташаббуси билан чиқдилар. Қўлга олинган шахс ҳақида Ўзбекистонга хабар берилди”, дейилади агентлик сайтида.

Уйнинг бир қисми қулаши оқибатида уч киши ҳалок бўлди

OtasH — Fri, 10 Nov 2017 07:44:37 GMT

Россиянинг Ижевск шаҳрида фавқулодда бахтсиз ҳодиса рўй берганлиги ҳақида хабар берилди. Ушбу воқеа Ижевскдаги кўп қаватли уйларнинг бирида содир бўлгани айтилмоқда. Маҳаллий журналистларнинг хабар беришича, уйнинг бир қисми қулаши натижасида уч нафар киши ҳалок бўлган. Улардан бири болакай экани маълум қилинган. Удмуртия Соғлиқни сақлаш вазирлиги берган хабарга кўра, тўрт нафар шахс жабрланган. Уларнинг иккитаси ўсмирлар, 55 ёшли аёл ва ФВВ ходими экани қайд этилди. Аниқлаштирилган маълумотларга кўра, пайшанба, 9 ноябрь куни шаҳар марказидаги тўққиз қаватли уйнинг бир қисми қулаган. 28 нафар шахс яшайдиган 8 та хонадон қулаб тушган. Тахминларга кўра, газ портлаши оқибатида уйнинг кириш қисми қулаган. Уйнинг бошқа аҳолиси кўчирилган бўлиб, қутқарувчилар уйнинг қулаган қисмида қутқарув ишларини олиб бораётганлари айтилган. Уйнинг кейинги тақдири унда текширувлар ўтказилганидан кейингина аниқ бўлади. Терговчилар қурилиш ишлари юзасидан жиноят иши қўзғатганликлари маълум қилинган.

Карлес Пуйоль Ўзбекистон терма жамоасини бошқаришга тайёр!

OtasH — Thu, 09 Nov 2017 18:46:05 GMT

Аввалроқ, Каталония “Барселона” клубининг собиқ футболчиси Карлес Пуйоль Ўзбекистонга етиб келгани ва уни бир қанча мухлислари кутиб олгани ҳақида хабар бергандик.

Ўз вақтида Испания терма жамоаси ва “Барселона” сафида фаолият олиб борган Карлес Пуйоль иштирокида бугун, 9 ноябрь куни “Hyatt Regency” меҳмонхонасининг “Самарқанд” залида матбуот анжумани бўлиб ўтди.

Собиқ футболчи матбуот анжуманида келажакда Ўзбекистон терма жамоасини бошқариши мумкинлиги ва Ўзбекистоннинг 2022 йилдаги жаҳон чемпионатида иштирок этишидан умидвор эканлигини билдириб ўтди.

“...Афсуски, Ўзбекистон терма жамоаси Россия мундиалидан қолиб кетган бўлсада, мамлакатингиздаги ёшларга берилаётган эътибор туфайли 2022 йилги жаҳон чемпионатида иштирок эта оласиз, деб ўйлайман.

Ўзбекистон терма жамоасини бошқараманми? Энди 40 ёшга кираман. Ҳозирча менда мураббийлик лицензияси йўқ.

Ўзимни мураббий сифатида иш бошлашим ҳақида ҳали бир қарорга келмадим. Лекин келажакда мураббийлик фаолиятимни бошласам, балки Ўзбекистон терма жамоасини ҳам бошқаришим мумкин.

Буни вақт кўрсатади, ҳозирча бир нима дея олмайман”, дейди Карлес Пуйоль матбуот анжуманида.

Маълумот учун, Пуйолнинг ташрифи ФИФА президенти Жанни Инфантино томонидан уюштирилаётган бўлиб, бу орқали ФИФА президенти Ўзбекистон футбол федерацияси томонидан Ўзбекистонда футболни янада ривожлантириш мақсадида амалга оширилаётган катта ҳажмдаги чора-тадбирларни қўллаб-қувватлаш ва футболнинг оммавийлигини оширишга ҳисса қўшишни мақсад қилган.

Карлес Пуйоль ташрифи давомида Ўзбеистондаги футбол академиялари тарбияланувчилари учун мастер-класслар ўтказиб беради.

Шунингдек, Олий лига 28-тур доирасида бўлиб ўтадиган “Пахтакор” ва “Олмалиқ” жамоалари ўртасидаги ўйинни бевосита “Пахтакор” стадионидан туриб томоша қилиб боради. Ўйин бугун, 9 ноябрь куни соат 17:00 да бошланади.

Эслатиб ўтамиз, ҳозирда Ўзбекистон терма жамоасига вақтинчалик бош мураббий сифатида “Насаф” устози Рўзиқул Бердиев тайинланган.

Ўзбекистон футбол федерацияси терма жамоани доимий бошқариши учун фақатгина хориждан мураббий олиб келинишини маълум қилганди.

Ўзбекистон терма жамоаси жорий йилнинг 14 ноябрь куни Бирлашган Араб Амирликларига қарши сафарда ўртоқлик учрашуви ўтказади.

Терма жамоа устози Рўзиқул Бердиев мазкур ўйинда легионер футболчилар хизматидан фойдаланмасликка қарор қилиб, Олий лига жамоаларидан 23 нафар футболчини жалб этган.

БАА миллий терма жамоасига қарши ўртоқлик ўйини 14 ноябрь куни Ал-Айн шаҳридаги “Халифа Бин Зайд” стадионида бўлиб ўтади. Учрашув Тошкент вақти билан соат 18:00 да бошланади.

Карлес Пуйоль Тошкентга етиб келди ва мухлислар томонидан кутиб олинди

OtasH — Thu, 09 Nov 2017 09:32:52 GMT

Аввалроқ, футбол бўйича Испания терма жамоаси ҳамда “Барселона” клубининг собиқ ҳимоячиси Карлес Пуйолнинг Ўзбекистонга ташриф буюриши ҳақида хабар бергандик. “Барселона” сафида 1999–2014 йиллар давомида тўп сурган тажрибали собиқ футболчиси Карлес Пуйоль бугун, 9 ноябрь куни (соат 02:00 да) Ислом Каримов номидаги Тошкент халқаро аэропортида ўнлаб футбол мухлислари томонидан кутиб олинди. Карлес Пуйоль ташрифи давомида Ўзбекистондаги футбол академиялари тарбияланувчилари учун мастер-класслар ўтказиб беради. Шунингдек, Олий лиганинг 28-тур доирасида бўлиб ўтадиган “Пахтакор” ва “Олмалиқ” жамоалари ўртасидаги ўйинни бевосита “Пахтакор” стадионида туриб томоша қилиб боради. Эслатиб ўтамиз, Карлес Пуйольнинг Ўзбекистонга ташрифи ФИФА президенти Жанни Инфантино томонидан уюштирилаётган бўлиб, бу орқали ФИФА президенти Ўзбекистон футбол федерацияси томонидан Ўзбекистонда футболни янада ривожлантириш мақсадида амалга оширилаётган катта ҳажмдаги чора-тадбирларни қўллаб-қувватлаш ва футболнинг оммавийлигини оширишга ҳисса қўшишни мақсад қилган.

O‘g‘ri kelinchak

OtasH — Thu, 09 Nov 2017 05:57:42 GMT

Shahardan qaytayotib, avtobusga chiqdim. Odam siyrak, ulovning hali jo‘naydigan shashti yo‘q. Bir-ikkita kitob xarid qilgandim, mutolaaga kirishdim. Bir payt:

– Bu joy bo‘shmi, opa? – deya so‘radi kimdir.

– Ha, bemalol. Hech kim yo‘q, – dedim. Qarasam, qo‘lida bola ko‘tarib olgan yosh kelinchak.

– Opa, telefoningizni berib turolmaysizmi? Onamga qo‘ng‘iroq qilib olsam, degandim, – so‘radi u.

Onasi bilan bir yig‘lamsirab, bir asabiy gaplashdi. Negadir, unga achindim, ko‘ngil so‘ragan bo‘ldim.

– Qachonlardir qilgan xatolarimning jabrini tortyapman. Aslida menga shu ham kam, – dedi o‘zini Munira deb tanishtirgan hamrohim.

– Nega unday deysiz, sabrli bo‘ling. Qarang, qanday shirin farzandingiz bor ekan, – dedim yupatgan bo‘lib.

– Ayting-chi, ko‘rinishimdan o‘g‘riga o‘xshaymanmi? Javobingiz aniq, yo‘q, to‘g‘rimi? Lekin bu haqiqat! …Men o‘g‘riman. Qo‘li egrilik o‘quvchilik davrimdan oilam barbod bo‘lgunga qadar ortimdan soyadek ergashib yurdi. Dastlab sinfdoshlarim mendan yuz o‘girishdi, ustozlarim avval nasihat, so‘ng dakki berib charchashdi. Maktabni bitirdim va ular o‘g‘ridan qutulishdi. Kollejda kursdoshlarimning pullari, narsalari yo‘qola boshladi. Bora-bora mendan o‘zlarini olib qochadigan bo‘lishdi. Mahalla-ko‘y ham bilardi. Shu sabab, chekka qishloqdan kelgan sovchilarga ota-onam ra’yimga ham qaramay, uzatib yuborishdi. Endi unday qilmayman, har holda oilali ayolman, deya o‘zim-o‘zimga so‘z berdim.

Yo‘q. Bukrini go‘r tuzatar ekan. Qaynona-qaynotamning omonatiga ham tap tortmay xiyonat qiladigan bo‘ldim. Bir kuni qaynonam so‘rab qoldi:

– Kelinjon, shkafning ustidagi pullarga ko‘zingiz tushmadimi? Qaynotangiz so‘rayotgandi.

– Yo‘q! – dedim ularning ko‘ziga tik qarab. Ammo o‘sha kuni ilk bor mendan shubhalanishayotganini sezdim. Oxiri o‘g‘riligim oshkor bo‘ldi. Qo‘ni-qo‘shni, to‘y-ma’rakaga borsak ham yana o‘sha eski hunar… yaqinlarimni uyatga qoldirardim.

– Nomusga o‘ldirding, yo‘qol ko‘zimdan. Ortiq sen bilan yashamayman, – deya erim uydan xaydab yubordi.

Qilmishlarim kasriga ota-onamning yuzi yerga qaradi. Osoyishta hayotim buzildi. Baxtim ham o‘g‘irlandi. Yo‘q, uni o‘zim o‘g‘irladim…

Avtobus bir muddatga to‘xtadi. Yo‘lovchilar toza havoga chiqishdi. Men ham hozir kelaman, deya suv ichgani tushdim. Ko‘p o‘tmay yana yo‘lda davom etdik.

Suhbat bilan chalg‘ib, manzilga ham yetib kelganimizni sezmay qolibman. U bilan xayrlashayotib:

– Singlim, egilgan boshni qilich kesmas, deyishadi. Hali ham kech emas. Borib kechirim so‘rang, farzandingiz kelajagini o‘ylang, – dedim.

– Maslahatingiz uchun rahmat, opajon. Ko‘nglimga ancha taskin berdingiz. Siz aytgandek qilaman, – dedi u xayrlashar ekan.

Qishlog‘imizga qatnaydigan taksiga o‘tirdim. Uyga yetgach, yo‘l kira haqqini to‘lay, deb sumkamga qarasam, hamyonim yo‘q ekan…

Гулсанам кимлигини яна бир бор кўрсатди... 16 нафар бола ундан миннатдор!

OtasH — Wed, 08 Nov 2017 17:38:07 GMT

Ўзбекистон халқ артисти Гулсанам Мамазоитова нафақат қўшиқлари, балки шахсий ҳаёти, оиласи, тарбияси ва маърифати билан кўпларга ўрнак бўлса арзийдиган, бугунги замон ёшларини маънавият ўчоғи томон бошлай оладиган, бир сўз билан айтганда, савияли хонанда. Бу унинг қўшиқларида, хатти-ҳаракатларида, гап-сўзида ўз ифодасини топган. Аҳмедов–Мамазоитовалар оиласи кеча, 7 ноябрь куни Тошкент шаҳридаги “Яккасарой” ресторанида элга олдига дастурхон ёзди. Ўзбекистон санъатининг таниқли юлдузлари созанда ва продюсер Санжар Аҳмедов ҳамда Гулсанам Мамазоитованинг иккинчи фарзанди бўлмиш Абдуғаффорнинг “ўғил тўйи”га йиғилишди. Эътиборли жиҳати шундаки, кеча ўтказилган тадбирда нафақат Санжар ва Гулсанамнинг фарзанди Абдуғаффорга, балки меҳрибонлик уйининг 16 нафар тарбияланувчисига ҳам “ўғил тўйи” қилиб берилди. Тўй болалар ва уларнинг тарбиячилар учун ажратилган дастурхон, совға-саломлар, энг таниқли хонандаларнинг қўшиқлари билан “ўғил тўйи” янада файзга кирди. Санжар ва Гулсанамнинг ушбу хайрли иши бошқа санъаткорларга ҳам ўрнак бўлса, ажаб эмас. Кўплаб таниқли хонандалар бундай савобли ишга қўл урса, биринчи бўлиб ОАВга хабар беради. Келтирган фойдасини бутун дунёга овоза бўлишини истайди. Санжар ва Гулсанам бундан мустасно бўлдилар. Тўйгача, тўйдан кейин ҳам бу саховатпешаликни овоза бўлишини истамадилар. Ижтимоий тармоқларда эса тўйга борган санъаткорлар Санжар ва Гулсанамни, таъбир жоиз бўлса, оғзидан бол томиб мақтамоқда. Дарвоқе, тўйда Ўзбекистон халқ артистлари Шерали Жўраев, Озодбек Назарбеков, Зулайҳо Бойхонова, Ўзбекистонда хизмат кўрсатган артистлар Мавлуда Асалхўжаева, Тожибар Азизова, Лола Аҳмедова, Юлдуз Турдиева, Зиёда Қобилова, хонандалар Гули Асалхўжаева, Наргиз, Аъло Раҳимова, Малика Эгамбердиева, Мадина Мумтоз, Дилсўз, Умидахон, Машҳурбек Раимжонов, Равшан Намозов, Отабек Муҳаммадзоҳид, Гуласал Абдуллаева меҳмон бўлишган. Маълумот учун, Санжар Аҳмедов ва Гулсанам Мамазоитованинг турмуш қурганларига бу йил 10 йил тўлди. Уларнинг Моҳижаҳонбегим исмли қизлари ҳам бор.